Media

Azərbaycan Notariat Palatasının  videoformatda növbəti Ümumi yığıncağı keçirilib.

Ümumi yığıncağın Hesablama komissiyası və katibi seçildikdən sonra Notariat Palatasının İdarə Heyətinin sədri Hüseyn Məmmədov gündəlikdə duran məsələləri iştirakçıların diqqətinə çatdırmışdır.

Azərbaycan Respublikası Ədliyyə Nazirliyinin Ədliyyə sahəsində xidmətlər baş idarəsinin rəhbərliyinin və əməkdaşlarının və respublikada fəaliyyət göstərən notariusların  iştirak etdiyi Ümumi yığıncaqda Notariat Palatasının İdarə Heyətinin sədri H.Məmmədov 2022-ci il üzrə illik ümumi hesabatla çıxış edərək Palata tərəfindən görülmüş işlər və həyata keçirilən layihələr barədə geniş məlumat vermişdir.  Palatanın Təftiş Komissiyasının sədri Tamerlan Qurban yığıncaqda  hesabat ili üzrə maliyyə hesabatı ilə çıxış etmişdir. Hesabatlar üzrə səsvermələr keçirilmiş və səs çoxluğu ilə təsdiq edilmişdir.

Azərbaycan Notariat Palatasının Müşahidə Şurasının sədri, Azərbaycan Respublikası Ədliyyə Nazirliyinin Ədliyyə sahəsində xidmətlər baş idarəsinin rəisi İlqar Məmmədov Notariat Palatasının fəaliyyəti ilə bağlı çıxış edərək, ilk öncə cari ilin “Heydər Əliyev” ili olmasını vurğulayaraq qeyd etmişdir ki, Ümummilli liderin 100 illiyi tədbirləri bütün dövlət qurumlarında olduğu kimi Ədliyyə orqanlarında da geniş qeyd olunur, dövlətimiz və xalqımız qarşısında misilsiz xidmətləri olan dahi rəhbərin çoxşahəli irsinin təbliğində vacib əhəmiyyət daşıyan müxtəlif tədbirlər təşkil edilir, mətbuatda çxışlar edilir. Müşahidə Şurası tərəfindən Palatanın fəaliyyətinin qanunvericiliyə uyğunluğunun öyrənilməsi çərçivəsində isə, İdarə Heyətinin aylıq əsaslarla keçirdiyi iclaslarda gündəmə gətirilən məsələlər və verilən qərarlar barədə mütəmadi olaraq İdarə Heyəti ilə müzakirələr aparılır, müvafiq tövsiyyələr verilir.

Sonra, AR Ədliyyə Naziriliyinin Notariat idarəsinin rəisi vəzifəsini icra edən Mirağa Abbasov notariat fəaliyyətinin təşkili və həyata keçirilməsi ilə bağlı inzibati orqan qismində görülən işlər və qarşıya qoyulan vəzifələr barəsində çıxış etmişdir.

Ümumi yığıncağın gündəliyinə daxil olan Notariat Palatasının nizamnaməsinə əlavə və dəyikliklər layihəsi məsələsi müzakirələrdən sonra səsverməyə qoyulmuş və təsdiq edilmişdir. 

Daha sonra, Palatanın İdarə Heyətinə və Təftiş Komissiyasına seçkilər keçirilmişdir. İştirakçılar tərəfindən irəli sürülən namizədlər səsvermələrin yekununda təsdiq edilmişdir.

Tədbirin sonunda notariat sahəsində uzun illər qüsursuz fəaliyyət göstərmiş və fəaliyyət müddətini başa vurmuş bir qrup notariusa Azərbaycan Notariat Palatası adından təşəkkür elan edilmişdir.