Медиа
Azərbaycan Notariat Palatası respublikada fəaliyyət göstərən notariuslar üçün onlayn təlimlər təşkil etmişdir.
20.09.2021
Azərbaycan Notariat Palatası Azərbaycan Respublikası Ədliyyə Nazirliyinin Qeydiyyat və notariat baş idarəsi ilə birgə respublikada fəaliyyət göstərən notariuslar üçün onlayn təlimlər təşkil etmişdir.
11 və 18 sentyabr 2021-ci il tarixlərində onlayn qaydada keçirilən təlimlərin mövzusu “Notariat fəliyyətinin psixoloji aspektləri” olmuşdur.
Təlimi açılış nitqi ilə Azərbaycan Notariat Palatasının İdarə Heyətinin sədri Hüseyn Məmmədov açaraq və iştirakçıları salamlayaraq bildirmişdir ki, notariat fəaliyyətinin inkişaf istiqamətləri içərisində notariusların peşə hazırlığının və ixtisasının artırılması böyük əhəmiyyət kəsb edir. Notariusların peşə hazırlığının və ixtisaslarının artırılmasının və tədrisi məsələsinin zəruriliyi “Notariat haqqında” Azərbaycan Respublikasının Qanununda və Notariat Palatasının Nizamnaməsində təsbit edilmişdir. Azərbaycan Notariat Palatası, Azərbaycan Respublikası Ədliyyə Nazirliyi Qeydiyyat və notariat baş idarəsi ilə birgə notariusların, həmçinin notariat ofisi əməkdaşlarının ixtisas səviyyəsinin artırılması məqsədilə təlim-tədris kursları müəyyən etmiş və bu təlimlərin hazırki pandemiya şəraitinə uyğun olaraq videoformatda, onlayn qaydada həyata keçirilməsi nəzərdə tutulmuşdur. Bundan sonra söz çıxış etməsi üçün Qeydiyyat və notariat baş idarəsinin baş məsləhətçisi Vidadi Mailə verilmişdir.
Qeydiyyat və notariat baş idarəsinin baş məsləhətçisi Vidadi Mail öz çıxışında notariatın yaranmasından bu zamana qədər mülki hüquqi münasibətlərdə notariatın önəmindən danışaraq tarixdə və günümüzdə notariat fəaliyyətinin müqayisəli və psixoloji təhlilini aparmış, hüquq və fəlsəfə alimlərinin notariat sahəsi barədə fikirlərini və yanaşmalarını şərh etmiş və notariusla vətəndaşlar arasındaki, həmçinin ofisdaxili psixoloji aspektlərə toxunaraq bu münasibətlərin hansı formada tənzimlənməli olmasını və mülki dövriyyədə və vətəndaşların hüquqlarının təmin olunmasında notariusların üzərinə düşən vəzifələri notariusların nəzərinə çatdırmışdır.
Təlimin sonunda məruzəçi, təlimlərin mütəmadi olaraq davam edəcəyinin nəzərdə tutulmasını vurğulamış və təlimlərdə əldə edilən biliklərin hər bir notariusun ixtisasının artırılmasına və peşə hazırlığının yüksəldilməsinə müsbət töhvə verəcəyinə əminliyini bildirmişdir.
Digər Xəbərlər
Berlində Beynəlxalq Notariat İttifaqının 31-ci konqresi keçirilib
06.10.2025
Azərbaycan Notariat Palatasının nümayəndə heyəti Qırğız Respublikasında keçirilən beynəlxalq konfransda iştirak edib 8-9 sentyabr 2025-ci il tarixlərində Qırğız Respublikasının İssık-Kul vilayətində “Notariat – dövlətin və cəmiyyətin xidmətində” mövzusunda beynəlxalq konfrans keçirilib. Qırğız Respublikası Notariat Palatasının təşkilatçılığı və dəvəti ilə Qırğız notariatının yaradılmasının 100 illiyinə həsr olunmuş tədbirdə Azərbaycan Notariat Palatasının nümayəndə heyəti iştirak edib. Beynəlxalq notariat konfransında Azərbaycan nümayəndə heyəti Azərbaycan Notariat Palatasının İdarə Heyətinin sədri Hüseyn Məmmədov, Bakı şəhəri 29 saylı notariat ofisinin notariusu İslam Mirzəzadə və 6 saylı Bakı “ASAN xidmət” mərkəzində notariat ofisinin notariusu Elvin Hüseynovdan ibarət tərkibdə təmsil olunub. Beynəlxalq tədbirdə Azərbaycan, Türkiyə, Qazaxıstan, Özbəkistan, Qırğız Respublikası, Rusiya, Belarus, Litva və Xorvatiya notariat palatalarının, həmçinin Qırğız Respublikasının dövlət qurumlarının nümayəndələri iştirak ediblər. Konfransda iştirakçı ölkələrin notariat sistemlərinin inkişaf tarixi, aparılan islahatlar və yeniliklər, rəqəmsallaşmanın notariat fəaliyyətində tətbiqi və notariatın inkişaf perspektivləri müzakirə olunub, təqdimatlar edilib. Konfransda çıxış edən nümayəndələr notariat institutunun hüquqi dövlətin formalaşmasında və vətəndaş cəmiyyətinə xidmətində oynadığı rolu vurğulayıb və bu sahədəki təcrübələrini bölüşüblər. Azərbaycan Notariat Palatasının sədri H.Məmmədov “Azərbaycan Respublikasında mülki münasibətlərin və mülki dövriyyənin notarial tənzimlənməsi” mövzusunda çıxış edərək, Azərbaycanda mülki münasibətlərin notarial tənzimlənməsinin inkişaf tarixi, notariat fəaliyyətinin yeni inkişaf mərhələsinə keçməsi prosesi, Azərbaycan Respublikasında müasir dövrdə notariat fəaliyyətinin əhatə dairəsi və perspektiv imkanlar barədə məruzə etmişdir. Səfər çərçivəsində nümayəndə heyəti Qırğız Respublikasının və digər iştirakçı ölkələrin təmsilçiləri ilə notariatın aktual məslələri üzrə fikir mübadiləsi aparmış, həmçinin Bişkek şəhərində fəaliyyət göstərən notariat ofisinin fəaliyyəti ilə tanış olmuşdur.
15.09.2025
Qırğız Respublikası Ədliyyə Nazirliyinin nümayəndə heyəti ilə Azərbaycan Notariat Palatasında işgüzar görüş keçirilib
10.09.2025