Медиа
Rusiya Federasiyasıyasının Sankt-Peterburq şəhərində “Notariat və müasirlik” mövzusunda beynəlxalq konfrans keçirilmişdir.
10.12.2023
8-9 dekabr 2023-cü il tarixlərində Rusiya Federasiyasıyasının Sankt-Peterburq şəhərində “Notariat və müasirlik” mövzusunda beynəlxalq konfrans keçirilmişdir.
Tədbirdə Rusiya Federasiyasının Federal Notariat Palatası, Rusiya Federasiyasının subyektlərinin notariat palataları, Belarus Notariat Palatası, Azərbaycan Notariat Palatası, Qazaxıstan Respublika Notariat Palatası, Özbəkistan Notariat Palatası, Avstriya Notariat Palatası və İspaniya Krallığının Barselona Vəkillər Palatası təmsil olunublar.
Rusiya ali dövlət orqanlarının, hüquq təsisatlarının və bir sıra dövlətlərin notariat palatalarının təmsilçilərinin qatıldığı tədbirdə Azərbaycan Notariat Palatasının nümayəndə heyəti iştirak edib. Nümayəndə heyətində Bakı şəhəri 17 saylı notariat ofisinin notariusu Süleyman Məmmədov və Ağcabədi regional “ASAN xidmət” mərkəzində notariat ofisinin notariusu Rzabəy Səlim-zadə təmsil olunublar.
Tədbirdə müasir notariatın aktual məsələləri "Notariat sahəsində beynəlxalq xüsusi hüququn praktiki məsələləri", "Müasir cəmiyyətin çağırışları və hüquq peşəsi", "Müstəqil Dövlətlər Birliyinə üzv dövlətlərin notariat fəaliyyəti sahəsində baza təşkilatı: ilk nəticələr və perspektivlər", "Xaricdə notariat fəaliyyəti: notariuslar və konsulluğun vəzifəli şəxslərinin əməkdaşlığı", "Qazaxıstan Respublikasının surroqat analıq müqavilələri haqqında qanunvericiliyi və notariat praktikası", "İspaniya qanunvericiliyində surroqat analıq məsələləri", "Belarus Respublikası qanunvericiliyinin yeniliyi: notariat praktikasında surroqat analıq", "Surroqat analıq müqaviləsi: hüquqi tənzimləmə problemləri və Rusiya Federasiyasında notariat təsdiqinin perspektivləri", "Notariat korporativ brendinin təşviqi strategiyası", "Başqa dövlətin notariusu tərəfindən verilmiş sənədlərlə işləyərkən ictimai elektron xidmətlərdən istifadə", "İspaniya notariatında informasiya texnologiyaları haqqında qısaca", "Avstriya notariuslarının fəaliyyətində informasiya və beynəlxalq aspektlər", “İri əqdlərin notariat qaydasında təsdiqlənməsinin xüsusiyyətləri”, "Məsafədən əməliyyatlar: müsbət və mənfi cəhətləri", “Kişinyov Konvensiyasının məsələləri” və “Notariat və məhkəmə: məhkəmənin müəyyən səlahiyyətlərinin notariusun yurisdiksiyasına verilməsi perspektivləri” mövzularında iştirakçılar öz təcrübələrini bölüşüblər.
Tədbirin sonunda iştirakçılar konfransın beynəlxalq notariat təcrübəsinin ümumiləşdirilməsinə, notariat fəaliyyətinin təkmilləşdirilməsinə və bu sahədə qabaqcıl təcrübələrin istifadəsinin tətbiqi vəziyyətini və perspektivlərini təhlil etməyə imkan yaratdığını və faydalı təcrübə mübadiləsi olduğunu bildirmişlər.
Digər Xəbərlər
Berlində Beynəlxalq Notariat İttifaqının 31-ci konqresi keçirilib
06.10.2025
Azərbaycan Notariat Palatasının nümayəndə heyəti Qırğız Respublikasında keçirilən beynəlxalq konfransda iştirak edib 8-9 sentyabr 2025-ci il tarixlərində Qırğız Respublikasının İssık-Kul vilayətində “Notariat – dövlətin və cəmiyyətin xidmətində” mövzusunda beynəlxalq konfrans keçirilib. Qırğız Respublikası Notariat Palatasının təşkilatçılığı və dəvəti ilə Qırğız notariatının yaradılmasının 100 illiyinə həsr olunmuş tədbirdə Azərbaycan Notariat Palatasının nümayəndə heyəti iştirak edib. Beynəlxalq notariat konfransında Azərbaycan nümayəndə heyəti Azərbaycan Notariat Palatasının İdarə Heyətinin sədri Hüseyn Məmmədov, Bakı şəhəri 29 saylı notariat ofisinin notariusu İslam Mirzəzadə və 6 saylı Bakı “ASAN xidmət” mərkəzində notariat ofisinin notariusu Elvin Hüseynovdan ibarət tərkibdə təmsil olunub. Beynəlxalq tədbirdə Azərbaycan, Türkiyə, Qazaxıstan, Özbəkistan, Qırğız Respublikası, Rusiya, Belarus, Litva və Xorvatiya notariat palatalarının, həmçinin Qırğız Respublikasının dövlət qurumlarının nümayəndələri iştirak ediblər. Konfransda iştirakçı ölkələrin notariat sistemlərinin inkişaf tarixi, aparılan islahatlar və yeniliklər, rəqəmsallaşmanın notariat fəaliyyətində tətbiqi və notariatın inkişaf perspektivləri müzakirə olunub, təqdimatlar edilib. Konfransda çıxış edən nümayəndələr notariat institutunun hüquqi dövlətin formalaşmasında və vətəndaş cəmiyyətinə xidmətində oynadığı rolu vurğulayıb və bu sahədəki təcrübələrini bölüşüblər. Azərbaycan Notariat Palatasının sədri H.Məmmədov “Azərbaycan Respublikasında mülki münasibətlərin və mülki dövriyyənin notarial tənzimlənməsi” mövzusunda çıxış edərək, Azərbaycanda mülki münasibətlərin notarial tənzimlənməsinin inkişaf tarixi, notariat fəaliyyətinin yeni inkişaf mərhələsinə keçməsi prosesi, Azərbaycan Respublikasında müasir dövrdə notariat fəaliyyətinin əhatə dairəsi və perspektiv imkanlar barədə məruzə etmişdir. Səfər çərçivəsində nümayəndə heyəti Qırğız Respublikasının və digər iştirakçı ölkələrin təmsilçiləri ilə notariatın aktual məslələri üzrə fikir mübadiləsi aparmış, həmçinin Bişkek şəhərində fəaliyyət göstərən notariat ofisinin fəaliyyəti ilə tanış olmuşdur.
15.09.2025
Qırğız Respublikası Ədliyyə Nazirliyinin nümayəndə heyəti ilə Azərbaycan Notariat Palatasında işgüzar görüş keçirilib
10.09.2025